پاکستان میں کاروبار کریں 2019

 کیا آپ نے  کبھی اپنا کاروبار شروع کرنے کے بارے میں سوچا ہے؟

 ہر وہ شخص جو اپنی ملازمت سے تنگ ہو ، ایسا سوچتا ہے اور بار بار سوچتا ہے ، لیکن نجانے کیا سوچ کر خود کو روک لیتا ہے ۔ شاید پیسہ نہ ہونے کی وجہ سے، اگر ایسا ہے، تو ہمارے پاس آپ کے لیے ایک بڑی خوشخبری ہے کہ آپ 10 ہزار روپے سے کم میں بھی اپنا کاروبار شروع کرسکتے ہیں اور ایک نہیں، ایسے کئی کاروبار ہیں، جو اس رقم میں شروع کیے جاسکتے ہیں۔ہو سکتا ہے، آپ یہ سمجھ رہے ہوں کہ یہ کوئی دیوانے کا خواب ہے، لیکن ہم آپ کو ابھی اور اسی وقت بتائیں گے، ایسے مختلف آئیڈیاز، جن کی مدد سے صرف 10 ہزار روپے میں کاروبار شروع کیا جاسکتا ہے:

 1۔ مشاورت:اگر آپ کسی مخصوص شعبے میں معلومات یا تجربہ رکھتے ہیں، جیسا کہ قانونی مشورہ یا پھر کاروبار کو ماحول دوست بنانے کے طریقے، تو آپ اپنی کنسلٹنگ ایجنسی شروع کرسکتے ہیں۔ اس میں بنیادی خرچہ صرف اپنے کاروبار کی مارکیٹنگ اور نیٹ ورکنگ کا ہوگا۔ اس لیے ویب سائٹ اور بزنس کارڈز پر پیسہ لگائیے اور شروع ہوجائیے۔ 2
۔ ٹیوٹر:ایسے طلبا کی تعداد کم نہیں، جنہیں مختلف موضوعات پر مدد کی ضرورت ہوتی ہے۔ چاہے وہ بنیادی کلاسوں میں ہو یا کالج میں۔ اگر آپ کے پاس تعلیم ہے، تو آپ ٹیوٹر بن سکتے ہیں اور یہ آپ کے لیے ایک اچھا کاروباری آغاز ہوسکتا ہے۔ چاہے آپ اپنے گھر پر پڑھائیں یا طلبا کے گھر جاکر، دونوں صورتوں میں آپ کی سرمایہ کاری بہت محدود بلکہ نہ ہونے کے برابرہو گی۔ 3۔ فری لانسنگ:آپ کسی بھی موضوع پر لکھ سکتے ہیں یا ویب ڈیولپنگ کرسکتے ہیں، تو آجکل کافی کماسکتے ہیں۔ آپ کو صرف صلاحیت، ایک لیپ ٹاپ اور ایک انٹرنیٹ کنکشن کی ضرورت ہوگی۔ فری لانسنگ پر آن لائن بہت مواد موجود ہے اور آپ کو آغاز میں کچھ خاص مشکل پیش نہیں آئے گی۔ 4۔ وی لاگنگ:آپ کے پاس لیپ ٹاپ، ٹیبلٹ یا سمارٹ فون ہے، جس میں کیمرہ موجود ہے، تو آپ مختلف موضوعات پر ویڈیوز بناکر انہیں یوٹیوب پر اپلوڈ کرسکتے ہیں۔ یوٹیوب نے اپنے اشتہاری پروگرام کو پاکستان میں یوٹیوب تک توسیع دے دی ہے۔ اس لیے آپ مختلف موضوعات یا ایک مخصوص موضوع پر اظہار خیال کرکے اشتہارات سے کافی پیسے کماسکتے ہیں۔ 5۔ موبائل آٹو ریپیئرنگ:اگر آپ کے پاس گاڑیوں کی معلومات اور آلات ہیں ،تو آپ اپنی آٹو ریپیئر شاپ کیوں نہیں کھول لیتے؟ بلاشبہ دکان کھولنا ایک مشکل اور محنت طلب کام ہے، لیکن موبائل آٹو ریپیئر شاپ کھولنا آسان ہے؟ رش کے اوقات میں مرکزی شاہراہوں پر آپ کو کئی جگہ خراب گاڑیاں ملیں گی۔ آپ ان گاڑیوں کے مالکان کے لیے رحمت کا فرشتہ بھی بن سکتے ہیں اور ایک زبردست کاروبار بھی چلا سکتے ہیں۔ 6۔ کرایہ داری:آجکل حالات کچھ مختلف ہوگئے ہیں۔ کسی زمانے میں کوئی بھی چیز کرائے پر دینا معیوب سمجھا جاتا تھا ،لیکن آجکل انٹرنیٹ کے اس دور میں بہت کچھ آسان ہوگیا ہے۔ خریدنے کی بجائے کرائے پر لینے کو ترجیح دی جاتی ہے اور آپ سب کچھ دے سکتے ہیں۔ اپنی گاڑی سے لے کر پارکنگ کی جگہ اور گھریلو چیزوں سے لے کر کمرہ تک۔ آپ کو بس آہستگی سے آغاز کرنا ہے۔ 7۔ ادھر ادھر کے کام:اگر آپ چھوٹی موٹی گھریلو مرمت کرسکتے ہیں، جیسا کہ بجلی کا ٹوٹا ہوا پینل جوڑ سکتے ہیں یا باورچی خانے میں سنک کے نیچے لگا پائپ جوڑ سکتے ہیں ،تو یہ آپ کے لیے ایک اچھا کاروبار بن سکتا ہے۔ اس کے آغاز میں بہت زیادہ پیسہ بھی نہیں لگتا اور آجکل اس کی طلب بھی بہت زیادہ ہے۔ 8۔ گھریلو کھانے:آپ بہت اچھی بریانی بنالیتی ہیں یا پھر کیک میں آپ کا کوئی ثانی نہیں یا پھر آپ کے کبابوں کا پورا خاندان دیوانہ ہے، تو اس صلاحیت کا بہترین استعمال کریں۔ باورچی خانہ تو آپ کے پاس پہلے سے ہی ہے۔ بنیادی سامان بھی میسر ہے۔ بس آپ کو پکانے کے مزید سامان، پیکیجنگ اور بنیادی مارکیٹنگ کی ضرورت ہوگی اور کاروبار شروع۔ 9۔ راشن فراہمی:راشن کی دکانیں گھروں پر فراہمی کا بندوبست تو رکھتی ہیں، لیکن بہت کم۔ آپ اپنی گاڑی، موٹر سائیکل یا سائیکل پر بھی یہ کام کرسکتے ہیں۔ صارفین سے سامان پہنچوانے کی قیمت لیں اور گھریلو ضرورت کا سامان ان کے دروازے پر پہنچائیں۔ ایک مرتبہ آپ کے پاس گاہکوں کی معقول تعداد ہوجائے، تو علاقے کی ہر دکان یہی چاہے گی کہ آپ اس سے سامان لیں۔ 10۔ بلاگنگ:اگر آپ کسی موضوع پر مہارت رکھتے ہیں، تو اس معلومات کو عام لوگوں تک پہنچانے کے لیے بلاگنگ اپنائیں۔ آپ اشتہارات کی جگہ فروخت کرکے پیسہ کماسکتے ہی یا پھر سبسکرپشن سروس بھی شروع کرسکتے ہیں۔ یہ ویڈیو بلاگنگ جیسا ہی کام ہے۔ بس اس میں تصویر کی بجائے تحریر کا میڈیم استعمال کیا جاتا ہے۔ 11۔ کونٹینٹ پروڈیوسر:اگر آپ بلاگنگ کے لیے اپنا سیٹ اَپ نہیں کرسکتے، اتنی تکنیکی اہلیت نہیں رکھتے،تو آپ دوسرے کے بلاگز کے لیے مواد لکھ سکتے ہیں۔ ایک باصلاحیت لکھاری کو مختلف ادارے اور ویب سائٹیں اچھی خاصی رقم دے سکتی ہیں اوریہ آپ کے لیے بہترین آمدین کا ذریعہ بن سکتا ہے۔ 12۔پروگرامنگ:پروگرام یا کوڈ کرنا سیکھیں، جیسا کہ روبی جیسی پروگرامنگ لینگویج جس سے آپ کافی کماسکتے ہیں۔ اس کے ذریعے آپ ڈیویلپر کا بزنس شروع کر سکتے ہیں۔ 13۔ موبائل ریپیئرنگ:اگر آپ کو کسی بھی چیز مرمت کا ہنر حاصل ہے، لیکن آپ دکان کھولنے کا پیسہ نہیں رکھتے، تو کلائنٹ کے پاس خود جائیں۔ یہ موبائل ریپیئر شاپ کسی کمپیوٹر کو ٹھیک کرنے کے لیے بھی ہوسکتی ہے یا فرنیچر کی مرمت کے لیے بھی، اس میں آپ کو صرف مارکیٹنگ اور تجربے کی ضرورت ہوگی۔ 14۔ آن لائن فروخت:اگر آپ کم قیمت میں اچھی چیز خریدنے کا ہنر رکھتے ہیں، جو پاکستان میں بڑی مہارت سمجھی جاتی ہے، تو آپ اس سامان کو او ایل ایکس یا ایسی ہی دیگر ویب سائٹوں پر فروخت کرکے اضافی پیسہ کماسکتے ہیں۔ ایسی چیزیں جن کی آن لائن خریداری کا رجحان زیادہ ہے۔ عام مارکیٹ سے لیں اور مناسب منافع کے ساتھ آن لائن فروخت کریں۔ بغیر کسی دکان کے اور کسی خاص بڑی سرمایہ کاری کے۔ 15۔ لوگو ڈیزائن:اگر آپ تخلیقی صلاحیت رکھتے ہیں تو لوگو ڈیزائن کرنا ایک بہترین آغاز ہوسکتا ہے۔ انوکھے لوگو کی تیاری یا ٹیمپلیٹس سے اٹھاکر انہیں نئے انداز میں پیش کرنے کی صلاحیت سے آپ آن لائن کافی کماسکتے ہیں۔ 16۔ ترجمہ کاری:دنیا چھوٹی ہوتی جا رہی ہے۔ کاروباری اداروں کو مارکیٹ میں داخل ہونے کے لیے مختلف زبانوں میں ترجمے کی ضرورت پڑتی ہے۔ اگر آپ کو انگریزی اور اُردو میں بیک وقت مہارت حاصل ہے یا پھر آپ اُردو کے ساتھ عربی بھی جانتے ہیں تو اس وقت پاکستان میں بآسانی ایک اچھا روزگار پا سکتے ہیں، وہ بھی بغیر کسی ملازمت کے۔ 17۔ ایپ ڈویلپمنٹ:موبائل انقلاب اس وقت اپنے عروج پر ہے اور ایپ بنانے کی صلاحیت اس وقت ہاتھوں ہاتھ لی جا رہی ہے۔ اگر آپ کے پاس اتنی پروگرامنگ مہارت ہے، تو آپ ایک بہت اچھا کاروبار اپنے گھر سے شروع کرسکتے ہیں۔ 18۔ فوٹوگرافر:شادی کی تقاریب سے لے کر عام تصویر کشی تک فوٹوگرافی اس وقت کافی اچھا کاروبار بن چکا ہے۔ گو کہ اچھے کیمرے اور متعلقہ سامان 10 ہزار روپے میں نہیں آئے گا، لیکن اگر آپ فوٹوگرافی کے شوق کو کاروبار بنانا چاہتے ہیں تو اس معمولی رقم پر اسے بزنس میں ڈھال سکتے ہیں اور کافی پیسہ کماسکتے ہیں۔ بات صرف تشہیر کی ہے۔ 19۔ فیشن ڈیزائن:اگر آپ کے اندر سلائی کڑھائی کی صلاحیت ہے اور آپ انوکھے ڈیزائن بناسکتی ہیں تو آجکل کے دور میں آپ بہت پیسہ بناسکتی ہیں۔ اپنی اس صلاحیت کو ضائع مت جانے دیں۔ مناسب تشہیر اور معمولی سازوسامان کے ذریعے آپ زندگی کا بہترین فیصلہ کرسکتی ہیں۔ 20۔ سفری مددگار:آپ سفر کے شوقین ہیں، اس کا کافی تجربہ بھی رکھتے ہیں، تو جان رکھیں کہ ایسے ہزاروں مسافر ہوتے ہیں جنہیں سفر میں مشکلات پیش آتی ہیں۔ آپ ان کے لیے ٹریول پلان بناکر اپنا کاروبار شروع کرسکتے ہیں